生番present: 花*靓clan - 屋邨女
等睇好戏

个故事发生喺屋邨里
个主角系一个屋邨女
我识佢嗰时　佢未够十四岁
青春啱啱开始　不过无人理佢
妈妈後悔同佢爸爸结婚
嫌佢无钱　每日想变心
爸爸为咗嗰几万蚊
问佢有无兴趣　同人假结婚
咁　佢仲点样好傻　好天真
你估系电视剧集　个个系千金
佢嘅故事　PG家长指引
偏偏　佢嘅家长唔喺佢附近
咁边一个　肯负责任
我肯定唔系佢个训导主任
一返到学校　就得个闹
叫佢罚抄　咁老土　佢无交
四十分　三十分
二十分　十分　零分
拒绝评分　丙等操行
佢嘅成绩表　唔见得人
唔理你要佢见乜人　依家比佢瞌阵
啲咁嘅问题少女　学校点会要佢
个原因好似系话怕俾佢影衰
於是佢埋堆　会有人照佢
无人会笑佢　起码有人要佢
嗱　话咁快　佢就有男仔追
嗰个男仔呢　啱啱十六岁
未够十八岁　嗰晚佢未合法醉
醉後　嗰一晚都系俾咗佢
佢以为过咗嗰晚之後　再无眼泪
好似台湾偶像剧里面嘅情侣
但佢无一直快乐落去
欲知後事如何　咁就继续听落去

个故事嚟到第二段
甜蜜嘅初恋　开始变得有啲酸
楼下嘅公园　成班坐喺泵泵转
佢班friend　话佢听　条仔一脚踏两船
吓　咁点算　佢有啲乱
唔知道　咁样算唔算　叫做失恋
呀　佢知道应该做咩事
拎支涂改液　喺墙上面度写字
写住　我不再爱他
画个心　然後用刀刮花
之後佢班friend扮哂专家
叫佢都系搵过件算啦
呀　咁啱电话响起　佢个friend打过嚟
话今晚有度唱K　钱唔驶俾　快啲过嚟
於是佢即刻过去　决定忘记过去
忘记半个月前先至识得嗰一个佢
所有问题　抛诸脑後　唔想面对
无人驾驶　失去方向　无箭嘴?
於是　你搵到佢　喺K房里　半醉
隔离嗰位　仲想将佢灌醉
问佢有无试过　咁又一粒
问佢有无试过　大力一吸
明明佢喺厕所　但已经唔知自己喺边
一步一步接近危险
返去继续饮　越饮越口乾
明明打冷震　但仲系流汗
嘿　你话青春就系咁荒唐
但佢索紧嗰行　并唔系方糖

事件曝光传媒各界　争相衍责
啲咁嘅社会问题　有边个嚟负责
无人够胆背　走近都觉得邋遢
等我访问下三位　听下佢地系点答
(前度男友)我同佢　都算系开心过罗
第一次啲货　佢都系问我攞
不过　佢今次服食过多
系我错罗　Sor罗
(训导主任)呢单个别事件　校方唔方便出面
嗰个女学生　不嬲罚企课室出面
一系唔出现　一返嚟无检点
一早话需要强制性毒品检验
(爸爸)呢啲晒米饭　好希望当初无生
佢系锺意玩　我咪由得佢去玩
最紧要咪烦　每晚我都要加班
点知　开饭先知　佢永远唔会返